2Cor 6 | NdeIBE | STEP | Njengabasebenza kanye loNkulunkulu siyalincenga ukuba lingamukeli umusa kaNkulunkulu ngeze.

2 Corinthians 6

1 Njengabasebenza kanye loNkulunkulu siyalincenga ukuba lingamukeli umusa kaNkulunkulu ngeze. 2 Ngoba uthi: “Ngesikhathi somusa wami ngalizwa, langosuku lwensindiso yami ngalisiza.” Zwanini, khathesi sekuyisikhathi somusa kaNkulunkulu, khathesi lusuku lwensindiso.

Izinhlupheko ZikaPhawuli

3 Kasibeki zikhubekiso endleleni yomuntu, ukuze imfundiso yethu ingasolwa. 4 Kodwa, njengezisebenzi zikaNkulunkulu sizethula ngazo zonke izindlela: ngokubekezela okukhulu; ekuhluphekeni, ebunzimeni kanye lasezinsizini;

5 ekutshayweni, ekuvalelweni entolongweni lakuziphithiphithi; ukusebenza nzima, ukungalali ebusuku kanye lendlala; 6 ukuhlambuluka, ukuqedisisa, ukubekezela kanye lomusa; ngoMoya oNgcwele langothando oluqotho;

7 ngokukhuluma iqiniso langamandla kaNkulunkulu; ngezikhali zokulunga esandleni sokudla lesenxele; 8 ngodumo langehlazo, ukukhulunyelwa kubi lokukhulunyelwa kuhle; siqotho, kodwa sikhangelwa njengabakhohlisi; 9 siyaziwa kodwa sikhangelwa njengabangaziwayo, abafayo, kodwa siqhubeka siphila; siyatshaywa, kodwa kasibulawanga, 10 sisosizini, kodwa sihlezi sijabula; simpofu, kodwa sinothisa abanengi; kasilalutho, kodwa silezinto zonke.

11 Sikhulume kini sikhululekile, maKhorinte, sazivula ngokupheleleyo izinhliziyo zethu kini.

12 Kasilugodli uthando lwethu kini, kodwa lina liyalugodla olweni kithi. 13 Okungaba yikuphana okuhle – ngikhuluma njengebantwaneni bami – lani zivuleni ngokupheleleyo izinhliziyo zenu kithi.

Lingazibopheli Labangakholwayo

14 Lingazibopheli ndawonye labangakholwayo. Ngoba ukulunga lobubi kulokuhambelana bani na? Loba yibudlelwano bani obungaba khona phakathi kokukhanya lobumnyama na? 15 Yikuzwana bani okukhona phakathi kukaKhristu loBheliyali na? Yikuhambelana bani okholwayo alakho longakholwayo na? 16 Yisivumelwano bani esikhona phakathi kwethempeli likaNkulunkulu lezithombe na? Ngoba thina silithempeli likaNkulunkulu ophilayo. Njengoba uNkulunkulu wathi: “Ngizahlala labo ngihambe phakathi kwabo, njalo ngizakuba nguNkulunkulu wabo bona babe ngabantu bami.”

17 “Ngakho phumani kubo lehlukane labo, kutsho iNkosi. Lingathinti lutho olungcolileyo, mina ngizalemukela.”

18 “Mina ngizakuba nguYihlo, lina lizakuba ngamadodana lamadodakazi ami, kutsho iNkosi uSomandla.”